Դասախոսություն 9. ՀՈՆՈՐԱՐԸ ԵՎ ՎՃԱՐՄԱՆ ՁԵՎԵՐԸ

Վճարման ձևն ու գումարի չափն ունեն իրենց առանձնահատկությունները և մեծ նշանակությունը թերապևտիկ գործընթացում:

 

Ցանկացած ծառայություն մատուցելիս նախապես պայմանավորվում են ծառայության գնի վերաբերյալ: Դա հնարավորություն է տալիս հետագայում զերծ մնալու բազմաթիվ անախորժություններից:

 

Վճարման մասին այցելուի հետ լավ է խոսել նախքան աշխատանքը սկսելը: Հարկավոր է քննարկել և ճշտել մանրամասները՝ կապված գումարի չափի և վճարման ձևի հետ, և միայն դրանից հետո վերջնականորեն պայմանավորվել: Որոշ դեպքերում կնքվում է նաև գրավոր պայմանագիր: Գոյություն ունի վճարման երկու տարածված ձև՝ ֆիքսված և չֆիքսված:

 

Ֆիքսված ձև․ թերապևտն այցելուին հայտնում է իր ժամավճարի չափը, որոշվում է հաճախականությունը և ըստ այդմ՝ ամսավճարը: Այս ձևը հիմնականում կիրառվում է հոգեբանական խորհրդատվության մեջ, տարբեր հոգեթերապևտիկ ուղղություններում և որոշ չափով՝ հոգեվերլուծության մեջ:

 

Չֆիքսված ձև․ այս դեպքում այցելուի նկատմամբ կիրառվում է անհատական մոտեցում: Հաշվի են առնվում հետևյալ հանգամանքները․

 

1) այցելուի ֆինանսական հնարավորությունները,

2) որքան է նա պատրաստ վճարել,

3) հասարակության սոցիալական վիճակը:

 

Գումարի ճիշտ ընտրված չափը նպաստում է այցելուի բուժմանը:

Այցելուն բուժման ընթացքում վճարում է այցելած և չայցելած սեանսների համար:

 

Այս պարագայում վճարման չափը և ձևը լրացուցիչ խթան են այցելուի համար․ դրանք նպաստում են այցելությունների կանոնավորության պահպանմանն ու այցելուի պարտաճանաչության զարգացմանն, ինչպես նաև՝ նրա պատասխանատվության բարձրացմանն, ինչը խիստ անհրաժեշտ է, մասնավորապես, նևրոզի բուժման ժամանակ:

 

 

Պետք է հաշվի առնել, որ սեանսների տևողությունը երկար է՝ ամիսներ, տարիներ: Գումարի չափը պետք է լինի այնքան, որ այցելուն ափսոսի և չբացակայի: Միևնույն ժամանակ, այն չպետք է լինի այնքան մեծ, որ այցելուն ընդհատի բուժումը: Գումարը կարելի է ավելացնել, բայց՝ ոչ պակասեցնել:

 

 

Վճարման ձևը նույնպես ունի ախտորոշիչ և բուժական նշանակություն: Ինֆորմացիան այն մասին, թե այցելուն ինչպես է կատարում իր սեանսների համար վճարումները, կարող է մասնագետին որոշակի տեղեկություններ տալ այցելուի անձնային որակների վերաբերյալ: Հարկավոր է ուշադրություն դարձնել հետևյալ հանգամանքներին․

 

1) այցելուն ժամանակին է կատարում վճարումները, թե՝ ուշացումով;

2) վճարումը կատարում է յուրաքանչյուր սեանսից հետո, շաբաթական, թե ամսական կտրվածքով;

3) գումարը հանձնում է առձեռն, դնում է սեղանին, տալիս է ծրարով և այլն;

4) խոշոր գումար է տալիս՝ մանրի վերադարձի ակնկալիքով, կամ տալիս է գումարի ճիշտ չափը:

 

Գումարի նշանակությունը հոգեվերլուծության մեջ․

 

1) օգնություն,

2) արդարություն,

3) իշխանություն,

4) մտերմություն,

5) ջերմություն,

6) սեռական մտերմություն,

7) պարտավորվածություն,

8 ) ագրեսիա,

9) կաշառք,

10) գայթակղություն,

11) պարգևատրում,

12) ուշադրություն,

13) կախվածություն։

 

 

 

Հոգեվերլուծական տեխնիկաները հոգեթերապիայում

Արա Չալիկյան

Խմբագրեց Նորա Վանյանը