ԲացՄուգ
Դասախոսություն 13. ԹԵՐԱՊԻԱՅԻ ՏԵՎՈՂՈՒԹՅՈՒՆԸ
Հոգեվերլուծական աշխատանքի սկզբում կամ ընթացքում այցելուները հետաքրքրվում են աշխատանքի տևողությամբ: Այս հարցն աշխատանքի տարբեր փուլերում տարբեր այցելուների մոտ բազմաթիվ իմաստներ կարող է կրել: Դրանցից մեկը «տնտեսական-ֆինանսական» իմաստն է: Քանի որ վերլուծությունը վճարովի է, բնական է, որ այցելուն ցանկանում է իմանալ, թե որքան կարող է այն տևել:
Ֆինանսական նկատառումներով աշխատանքի ընդհատումը նույնքան վնասակար է, որքան ցանկացած այլ պատճառով աշխատանքի ընդհատումը: Հետևաբար՝ ցանկալի է նախապես պատրաստվել ինքնաճանաչման երկարատև գործընթացին և հնարավորինս ճիշտ հաշվարկել սեփական միջոցները:
Վերլուծական աշխատանքը տևում է ամիսներ և նույնիսկ տարիներ: Սակայն, ինչպես ամեն ինչ, վերլուծությունը նույնպես ունի սկիզբ և ավարտ: Քանի որ ինքնաճանաչման աշխատանքը բարդ է և կախված է բազմաթիվ գործոններից, ոչ ոք երբևէ չի կարող կանխագուշակել դրա իրական տևողությունը:
Այդուհանդերձ, ցանկալի է, որ թե՛ այցելուն, թե՛ հոգեվերլուծողը կարողանան աշխատել «անորոշության մեջ»: Կյանքում հաճախ է լինում, երբ գործ ենք ունենում կարևոր, սակայն ոչ ստույգ, անորոշ երևույթների հետ: «Անորոշի» հետ աշխատելու ունակությունը շատ կարևոր է թե՛ կյանքում, թե՛ վերլուծական աշխատանքում:
Հոգեվերլուծությունը մարդկային գործունեության այն տեսակն է, որը, տեղի ունենալով բազմաթիվ անորոշությունների առկայության պայմաններում, միաժամանակ մարզում է այդ անորոշություններին դիմագրավելու ունակությունը:
Ցանկալի է, որ վերլուծողն այցելուին հայտնի վերլուծական աշխատանքի երկարատևության, ժամանակային և այլ առումներով անորոշության մասին: Աշխատանքի տևողության վերաբերյալ ստույգ ժամկետ նշելը տեղին չէ:
Մյուս կողմից՝ հարկավոր է այցելուին հայտնել, որ նա ցանկացած պահի իրավունք ունի միակողմանիորեն ընդհատելու վերլուծական աշխատանքը։ Դա նրան կտա ապահովության զգացում, ինչը կնպաստի աշխատանքի արդյունավետ ընթացքին:
Երբեմն հարկավոր է լինում, որ այցելուն, ունենալով վերլուծության համար նախատեսված գումար, մտածի նոր միջոցներ վաստակելու կամ ձեռք բերելու մասին, որպեսզի աշխատանքը վաղաժամ չընդհատվի: Վերլուծվողը պետք է ձգտի լինել ինքնուրույն և պատասխանատու նաև ֆինանսական միջոցներ վաստակելու և ծախսերի առումով:
Վերլուծական աշխատանքը կողմերից պահանջում է լինել ոչ միայն աշխատասեր, այլ նաև խիզախ և դիմացկուն: Սակայն ինչպիսի դժվարությունների էլ այցելուն հանդիպի իր թերապիայի ժամանակ՝ դրանք նրան տանում են դեպի հասունացում, ինքնուրույնություն՝ նրան պատասխանատու դարձնելով իր սեփական անձի և կյանքի նկատմամբ:
Նմանատիպ դժվարությունները նպաստում են առավել ադապտացված անձի ձևավորմանը:
Վերլուծական աշխատանքի երկարատևության վրա կարող են ազդել մի շարք գործոններ.
- Որքան բարձր է վերլուծվող անձի «աններդաշնակության» աստիճանը, այնքան ավելի երկար կտևի վերլուծական աշխատանքը:
- Որքան մեծ լինի սեփական անձը ճանաչելու և անձնային խնդիրները լուծելու մոտիվացիան, այնքան ավելի կարճատև կլինի վերլուծական աշխատանքը:
- Որքան շատ և ուժեղ լինեն անձի դիմադրություններն, այնքան աշխատանքը երկարատև կլինի:
- Որքան մեծ ծավալի աշխատանք կատարի վերլուծվողը միջսեանսային ժամանակահատվածում, այնքան կարճատև կլինի նրա թերապիան:
- Մյուս հավասար պայմաններում այցելությունների հաճախականության մեծությունն ուղիղ համեմատական է թերապիայի վաղ ավարտին:
- Թերապիայի արագ կամ դանդաղ ընթացքին կարող են նպաստել այցելուի կյանքում առկա բազմաթիվ օբյեկտիվ և սուբյեկտիվ գործոններ՝ ընտանիքի անդամները, ծնողները, աշխատանքի բնույթը, սոցիալական բազմաթիվ գործոններ և այլն:
Ինչևէ, անձի թերապիան՝ իբրև ինքնաճանաչման և ինքնազարգացման գործընթաց, վերջ չունի և ընթանում է մարդու ողջ կյանքի ընթացքում: Երբ խոսում ենք թերապիայի մասին, նկատի ունենք այցելուի և վերլուծողի միջև ընթացող աշխատանքը: Ուստի՝ թերապիան կարելի է համարել հաջողված, երբ դրա արդյունքում այցելուն ձեռք է բերում ինքնուրույն որակյալ վերլուծություններ կատարելու ունակություն:
Ուսուցողական (դիդակտիկ) վերլուծության ավարտից հետո ենթադրվում է այցելու-թերապևտ հարաբերությունների շարունակություն՝ սուպերվիզիաների ձևով:
Պետք է նշել, որ թերապիայի ավարտի վերաբերյալ վերոհիշյալ ցուցանիշները վերաբերում են դասական վերլուծությանը:
Դասական առումով վերջնական է համարվում այն վերլուծությունը, որի հետևանքով վերլուծվողն անձի այնպիսի որակներ է ձեռք բերում, որոնք նրան հնարավորություն են տալիս աշխատելու որպես վերլուծող:
Վերլուծության ավարտի վերաբերյալ որոշումը, ցանկալի է, որ կայացնեն վերլուծության երկու կողմերը՝ դրան նվիրելով մեկ կամ նույնիսկ մի քանի սեանս: Դա շատ կարևոր է, քանի որ անավարտ վերլուծությունն ավարտված համարելով՝ կարելի է վերլուծվողին մեծ վնասներ հասցնել: Նման պարագայում պատասխանատվությունը երկկողմանի է: Բացառություն են կազմում այն դեպքերը, երբ վերլուծողը զգուշացնում է վերլուծվողին նրա վերլուծության անավարտության և դրանից բխող ռիսկերի վերաբերյալ:
Աֆորիզմներ
Վերջը լավ լինի:
Ճտերն աշնանն են հաշվում:
Լավ սկիզբը բերում է լավ ավարտի:
Միայն աշխատանքի վերջում ենք առավել լիարժեք գիտակցում, թե որքան խնդիրներ ենք ունեցել:
Լավ է ուշ, քան երբեք:
Ուշ լինի, նուշ լինի:
Յոթ չափիր, մեկ կտրիր:
Հոգեվերլուծությունը թան չէ, ամեն մարդու բան չէ:
Հոգեվերլուծական տեխնիկաները հոգեթերապիայում
Արա Չալիկյան
Խմբագրեց Նորա Վանյանը
ՀՈԳԵՎԵՐԼՈՒԾԱԿԱՆ ՄԵԹՈԴՆԵՐՆ ՈՒ ՏԵԽՆԻԿԱՆԵՐԸ ՀՈԳԵԹԵՐԱՊԻԱՅՈՒՄ >Դասախոսություն 13. ԹԵՐԱՊԻԱՅԻ ՏԵՎՈՂՈՒԹՅՈՒՆԸ
Դասընթացի բովանդակություն
ՀՈԳԵՎԵՐԼՈՒԾԱԿԱՆ ՄԵԹՈԴՆԵՐՆ ՈՒ ՏԵԽՆԻԿԱՆԵՐԸ ՀՈԳԵԹԵՐԱՊԻԱՅՈՒՄ
Դասախոսություն 1. ՆԵՐԱԾՈՒԹՅՈՒՆ Անվճար
Թեստ 1.
Դասախոսություն 2. ՀՈԳԵՎԵՐԼՈՒԾԱԿԱՆ ՇՐՋԱՆԱԿ, ԿԱՄ «ԿԱԴՐ» Անվճար
Թեստ 2.
Դասախոսություն 3. ԱՇԽԱՏԱՆՔԱՅԻՆ ՀԱՄԱՁԱՅՆՈՒԹՅՈՒՆ, ԿԱՄ «ԱԼՅԱՆՍ» Անվճար
Թեստ 3
Դասախոսություն 4. ՎԵՐԼՈՒԾԱԿԱՆ ԴԻՍՏԱՆՑԻԱ Անվճար
Թեստ 4.
Դասախոսություն 5. ԴԻՍՏԱՆՑԻԱՅԻ ԴԻՆԱՄԻԿԱՆ ԹԵՐԱՊԻԱՅԻ ԸՆԹԱՑՔՈՒՄ Անվճար
Թեստ 5.
Դասախոսություն 6. ՏՐԱՆՍՖԵՐ ԵՎ ԿՈՆՏՐՏՐԱՆՍՖԵՐ Անվճար
Թեստ 6.
Դասախոսություն 7. ԲԱԶՄՈ՞Ց, ԹԵ՞ ԲԱԶԿԱԹՈՌ Անվճար
Թեստ 7.
Դասախոսություն 8. ՍԵԱՆՍՆԵՐԻ ՀԱՃԱԽԱԿԱՆՈՒԹՅՈՒՆԸ Անվճար
Թեստ 8.
Դասախոսություն 9. ՀՈՆՈՐԱՐԸ ԵՎ ՎՃԱՐՄԱՆ ՁԵՎԵՐԸ Անվճար
Թեստ 9.
Դասախոսություն 10. ԵՐԱԶՆԵՐԻ ՎԵՐԼՈՒԾՈՒԹՅՈՒՆ Անվճար
Թեստ 10.
Դասախոսություն 11. ԱԶԱՏ ԶՈՒԳՈՐԴՈՒՄՆԵՐ՝ ԱՍՈՑԻԱՑԻԱՆԵՐ Անվճար
Թեստ 11.
Դասախոսություն 12. ԼՌՈՒԹՅՈՒՆ Անվճար
Թեստ 12.
Դասախոսություն 13. ԹԵՐԱՊԻԱՅԻ ՏԵՎՈՂՈՒԹՅՈՒՆԸ Անվճար
Թեստ 13.
Դասախոսություն 14. ՆԵՎՐՈԶԸ ՏՐԱՆՍՖԵՐՈՒՄ, ԿԱՄ «ԲԱԼԸ ՇՈԿՈԼԱԴՈՒՄ» Անվճար
Թեստ 14.
Դասախոսություն 15. ԻՆՉՊԵՍ ԴԻՄԵԼ ՄԻՄՅԱՆՑ Անվճար
Թեստ 15.
Դասախոսություն 16. ՄԵԿՆԱԲԱՆՈՒԹՅՈՒՆԸ ՎԵՐԼՈՒԾՈՒԹՅԱՆ ԸՆԹԱՑՔՈՒՄ Անվճար
Թեստ 16.
Դասախոսություն 17. ԹԵՐԱՊԻԱՅԻ ՍԿԻԶԲՆ ՈՒ ԱՎԱՐՏԸ Անվճար
Թեստ 17.
Դասախոսություն 18. ԿԱՐԵՎՈՐԸ՝ ՍԵԱՆՍԻ ՎԵՐՋՈՒՄ Անվճար
Թեստ 18.
Դասախոսություն 19. ԽՈՍԱԿՑՈՒԹՅՈՒՆՆԵՐ՝ ՍԵԱՆՍԻՑ ՀԵՏՈ Անվճար
Թեստ 19.
Դասախոսություն 20. ՕՐԻՆԱԿՆԵՐ՝ ԹԵՐԱՊԵՎՏԻ ԱՆՁՆԱԿԱՆ ԿՅԱՆՔԻՑ Անվճար
Թեստ 20.
Դասախոսություն 21. ԱՐՏԱՀԵՐԹ ՀԱՆԴԻՊՈՒՄՆԵՐ Անվճար
Թեստ 21.
Դասախոսություն 22. ԱՐՏԱԱՇԽԱՏԱՆՔԱՅԻՆ ՀԱՐԱԲԵՐՈՒԹՅՈՒՆՆԵՐ Անվճար
Թեստ 22.