Դասախոսություն 21. ԱՐՏԱՀԵՐԹ ՀԱՆԴԻՊՈՒՄՆԵՐ

Հանդիպումները համարվում են արտահերթ, երբ տեղի են ունենում նախապես պայմանավորված հաճախականությունից դուրս:

 

Արտահերթ հանդիպումներ կարող են տեղի ունենալ ինչպես այցելուի, այնպես էլ թերապևտի նախաձեռնությամբ` կողմերի համաձայնությամբ: Կողմերը լրացուցիչ հանդիպման առաջարկներից հրաժարվելու իրավունք ունեն:

 

Արտահերթ հանդիպումներն անցկացնելիս հարկավոր է պահպանել «հոգեվերլուծական շրջանակի» բոլոր կանոններն՝ անցկացման տեղը կամ ձևը, պայմանավորված օրը, ժամը, տևողութունը և այլն: Արտահերթ հանդիպումները վճարվում են այնպես, ինչպես հերթականները:

 

Վճարման փաստը նպաստում է «աշխատանքային շրջանակի» պահպանմանն, ինչպես նաև լրացուցիչ հանդիպման իրական դրդապատճառների բացահայտմանը: Բացառություն են կազմում այն դեպքերը, երբ արտահերթ հանդիպումը կամ հանդիպումները լրացնում են թերապևտի բացակայության պատճառով չկայացած սեանսները:

 

Արտահերթ հանդիպման առաջարկ թերապևտի կողմից կարող է լինել հետևյալ դեպքերում․

 

1․ Երբ վերլուծողի պատճառով այցելուն մեկ կամ մի քանի սեանս է բաց թողել: Նման երևույթ շատ հազվադեպ է հանդիպում՝ հոգեվերլուծողների մեծ մասը մեկ աշխատանքային տարվա կտրվածքով չի բացակայում և չի ուշանում և ոչ մի անգամ:

 

2. Երբ այցելուն բաց է թողել մեկ կամ երկու սեանս:

 

3. Երբ այցելուն, ըստ վերլուծողի, լրացուցիչ աշխատանքի կարիք ունի, սակայն ինչ-ինչ պատճառներով դեռ չի դիմել այդ հարցով:
 

Արտահերթ հանդիպումներ՝ այցելուի ցանկությամբ․

 

1․ Երբեմն այցելուի կյանքում առաջանում են այնպիսի արտակարգ իրավիճակներ, երբ մասնագիտական արտահերթ օգնության կարիքը դառնում է անհետաձգելի: Նման դեպքերում այցելուն իրավունք ունի լրացուցիչ հանդիպում խնդրելու թերապևտից:

 

2․ Լինում են դեպքեր, երբ ընթացիկ հաճախականությունը բավարար չէ «կուտակված» նյութի վերլուծության համար: Նման պարագայում այցելուն կարող է լրացուցիչ հանդիպում խնդրել թերապևտից:

 

3․ Երբ այցելուի մոտ հարց է առաջանում՝ ավելացնե՞լ հիմնական սեանսների հաճախականությունը, թե՞ ոչ: Այս դեպքում կարելի է մի քանի արտահերթ սեանս անցկացնել՝ պարզելու համար կանոնավոր սեանսների հաճախականությունն ավելացնելու անհրաժեշտությունը:

 

4. Արտահերթ հանդիպում անցկացնելու հիմքում կարող է լինել նաև թերապևտին լրացուցիչ անգամ տեսնելու, նրա հետ շփվելու «տրանսֆերային» միտումը:

 

5․ Հնարավոր է արտահերթ հանդիպման ցանկության առաջացում վախի ազդեցության ներքո, երբ այցելուն մտածում է, թե չի կարող ինքնուրույն հաղթահարել իր «անհանգստությունները» մինչև հաջորդ հանդիպումը:

 

Վերլուծական աշխատանքում, հատկապես՝ հայաստանյան իրականությունում, հաճախ են լինում դեպքեր, երբ այցելուն խնդրում է «տեղափոխել» իր սեանսը մեկ այլ ժամ կամ օր: Վերլուծության դասական կանոնների համաձայն՝ «տեղափոխված» սեանսը պետք է համարվի լրացուցիչ: Վճարվում է և՛ բաց թողնված սեանսը, և՛ «տեղափոխվածը»:

 

Հնարավորությունների սահմաններում ցանկալի է ընդառաջել լրացուցիչ հանդիպում ստանալու այցելուի ցանկությանը: Սակայն, բացի լրացուցիչ սեանս բերված նյութից, ամեն անգամ հարկավոր է փորձել վերլուծել նաև հանդիպման արտահերթության պատճառը: Դա շատ կարևոր է և օգտակար թերապիայի առաջխաղացման համար:

 

Երբ արտահերթ հանդիպումները սկսում են հաճախ կրկնվել, կարելի է մտածել դրանց «օրինական» կարգավիճակ տալու մասին: Շաբաթվա պարբերական հանդիպումները կարելի է ավելացնել մեկով: Այդ նպատակով, ինչպես վերը նշեցինք, կարելի է մի քանի լրացուցիչ սեանս անցկացնել՝ դրանց անհրաժեշտությունը ճշտելու համար:

 

Ամեն դեպքում, լրացուցիչ հանդիպման որոշումը պետք է կայացվի երկու կողմերի համաձայնությամբ և պատասխանատվությամբ՝ պահպանելով վերլուծական աշխատանքի կանոնները, հատկապես հետևյալը` «Սեանսների հաճախականությունն ու վարձավճարն ավելացնել կարելի է, սակայն պակասեցնել՝ ոչ»: Դա «վերլուծական շրջանակի» ևս մեկ կարևոր բաղադրիչ է:

 

 

 

Հոգեվերլուծական տեխնիկաները հոգեթերապիայում

Արա Չալիկյան

Խմբագրեց Նորա Վանյանը